काठमाडौं । यस वर्षको बालोन डी’ओर अवार्ड फ्रान्स तथा पेरिस सेन्ट जर्मेन (पीएसजी) का स्ट्राईकर औसमाने डेम्बेलेले जितेका छन् ।
डेम्बेलेले गत सिजन पीएसजीलाई च्याम्पियन्स लिग, लिग वान र फ्रेन्च कप जिताउन महत्त्वपूर्ण भूमिका निर्वाह गरेका थिए ।
२८ वर्षीय डेम्बेले डी’ओर अवार्ड जित्ने फ्रान्सका छैटौँ खेलाडी बनेका छन् । यसअघि रेमन्ड कोपा, मिचेल प्लाटिनी, जियान पियरी पपिन, जिनेदिन जिदान र करिम बेन्जेमाले अवार्ड जितेका थिए ।
यस्तै महिलातर्फको अवार्ड स्पेन तथा बार्सिलोनाकी स्ट्राईकर आइटाना बोनमतीले जितेकी छन् । उनले लगातार तेस्रो पटक अवार्ड जित्दै गरेकी हुन् ।
उत्कृष्ट युवा खेलाडीको अवार्ड स्पेन तथा बार्सिलोनाका युवा स्ट्राईकर लामिन यमालले हात पारे । महिलातर्फ स्पेनकै भिकी लोपेजलाई प्रदान गरियो ।
पीएसजीका लुइस एनरिके उत्कृष्ट प्रशिक्षक चुनिए । पीएसजीकै जियानलुजी डोनारुमा उत्कृष्ट गोलरक्षक बने । जियानलुजी हाल इङ्लिस क्लब म्यानचेस्टर सिटी पुगेका छन् ।
उत्कृष्ट स्ट्राईकरमा पुरुषतर्फ स्विडेनका भिक्टोर ग्योकेरेस र महिलातर्फ पोल्यान्डकी इवा पाजोर चुनिए । महिलातर्फ उत्कृष्ट टोलीको अवार्ड आर्सनल र प्रशिक्षकमा इङ्ल्यान्ड महिला राष्ट्रिय टोलीकी सरिना विग्म्यानलाई प्रदान गरियो ।
